اوبريت العيد الكبير

ضمن فقرات حفل ختام الموسم الصيفي 2019 لجمعية الرعاية المتكاملة بطور سيناء

تأليف و ألحان و إخراج
مصطفى طراد


العيد الكبير له حكاية جميلة و طريفة
نحكيها و نتعلم منها الحكمة اللطيفة

النبى ابراهيم خليل الرحمن
وستنا هاجر خلِّف منها غلام
و بأمر الإله بعد ما شاف منام
ساب زوجته و ضناه فى البيت الحرام

شوف و اتفرج ع اللى هيحصل
أم و ابنها ف الصحرا
طفل بيبكى و أم بتجرى
بين جبل الصفا و المروة
و الأب واقف يدعى يقول :
( ربى اجعل هذا البلد آمنا )
زمِّى .. زمِّى .. زمِّى .. زمِّى
و انفجرت عين الميَّة
زمِّى .. زمِّى .. زمِّى .. زمِّى
من تحت رجل اسماعيل
الأم تلملم فيها
و بايديها تحويها
زمزم يا عين الميَّة
حمدا للى بيجريها

كبر اسماعيل و كان شباب
إتجوِّز و بقاله أصحاب
جاله أبوه من بعد غياب
ياللا معانا نشوف قالوا ايه :
الأب : يا بنىَّ يا اسماعيل .. شفت حلم لكن عجيب
الإبن : خير يا والدى شفت ايه
الأب : شفت إنِّى أدبحك .. قول معايا أعمل ايه
المجموعة : يعمل ايه ... ؟ .. يعمل ايه ؟ .....
الإبن : اللى شُفته دا يا والدى .. أمر ربِّى مش منام
نفِّذه دلوقت حالاً .. سنّ سكِّنك قوام
الأب : السكينة ما بتدبحش
الإبن : سِنّ السِّكينة يا والدى
الأب : السِّكينة ما بتدبحش
الإبن : حاصبر نفِّذ أمر ربِّى
المجموعة : رفع ابراهيم ايده للسَّما
شاف الهديَّة مقدِّمة
ربِّى فدا سيدنا اسماعيل
بخروف من الجنَّة سمين
ياللا افرحوا يا مسلمين

يا خروف العيد يا بو فرو جديد
لحمك لذيـــذ وفروتك
نغزل منها الصوف المفيد
نلبس و نفرَّق لحمتك
ياكل منها غنى و فقير
نفرح بالعيد يوم جيِّتك
يا خروف العيد
يا خروف العيد

ـــ&ـــ